مساكم خير وطيبة يا أهل مصر المحروسة.. عاملين إيه؟ الجو برد قوي النهاردة.. صحيح، مش تقولولي مبرووك أصل الموكوس جوزي «كابوس» أفندي حَّن عليّا وناوي يطلعني أعمل عُمرة.. ياااه مستنياها بقالي كتير، حوّشنا حبة فلوس وقولنا نعمل حاجة لله، قررنا نسيب العيال عند أمه مع إني عارفة إنها مش طايقاهم، بس أنا هكبس على نفسها..هِه يلّا ربنا يديها على قد نيتها.
حكايتي ليكم النهاردة عن حلم خطير.. ممكن يقلب الدنيا، وييجي على دماغ «كابوس» أفندي، بعد يوم طويل، وصداع رهيب مسكني طول اليوم بسبب البيت والغسيل والطبيخ، قررت أدخل ارتاح شوية، وقولت أفتح التلفزيون اتسلى بالأخبار شوية لحد ما أنام، البداية كانت خبر عن إحراق السفارة السعودية بالعاصمة طهران.. «يالهوي هيا ناقصة، مش كفاية المشاكل اللي بين البلدين ربنا يستر».. ده أول حاجة جت في دماغي، ودعيت ربنا لما نروح العُمرة ميحصلش حاجة ولو حصل يبقى لكابوس أفندي، وأنا بدعي عليه، عنيا غمضت ونمت وكانت بداية الحلم..
«أذانٌ يصدح في أرجاء المكان.. صوتُ عذب، وأناسٌ تبكي من الإيمان، والكعبة تضئ من كل اتجاه»، أنا خلاص في السعودية، بعمل العمرة، بدعي ربنا وأنا ببكي وما تيّسر من الشعائر الدينية، قررت أروح الفندق وارتاح شوية لحد ما تيجي صلاة العشاء، وأنا رايحة الفندق سمعت ناس بتقول؛ «معقول ده!! إزاي ده يحصل!! والملك سلمان هيسكت!؟».. لقيت واحدة سعودية، ودار بينا الحديث الآتي:
« خير يا حببتي في حاجة ولا ايه؟»، ردت عليا وقالتلي: «نعم أختي، الحرس الثوري الإيراني خطف أميرة من أميرات السعودية والله هاذي مهزلة، والملك سلمان ما راح يسكت على هذا الموضوع»، قلتلها: «يا نهار ملحوس إزاي كدة؟»، قالتلي: «الحرس الثوري الإيراني كان بيتجسس على السعودية، وتعقبوا الأميرة وحطفوها»، قلتلها: «طيب يا حببتي ربنا يردها لأهلها»، ومشيت وطلعت أوضتي وقلت ربنا يستر يعني كان لازم يخطفوها وأنا هنا؟ كانوا استنوا لما أرجع مصر، وبفتح التليفزيون على الأخبار، الدنيا مقلوبة في كل حتة.
«خطف أميرة من أميرات السعودية على يد الحرس الثوري الإيراني.. إيران تؤكد المعلومة: تم خطف أميرة من أميرات السعودية.. أمريكا تدين عملية خطف الأميرة.. مصر تبادر بمفاوضات لتسلم الأميرة.. وفي كلمة لعضو برلماني إيراني عن التيار المتشدد: السعودية ستدفع ثمنًا باهظًا نتيجة تنفيذ حكم الإعدام بحق زعيم الشيعة في السعودية، نمر النمر.. خططنا لخطف الأميرة، وسوف نقوم بإعدامها، وهذا انتقامًا لتنفيذ حكم الإعدام لـ«النمر»، وأيضًا لتنفيذ حكم الأعدام على 27 من الطلاب المتظاهرين في السعودية لنشر المذهب الشيعي».
يا عيني يا بنتي طيب وبعدين؟ وأذان العشاء بيأذن قلت أنزل أصلي وربنا يستر، وأنا في الفندق لقيت واحد من الظباط اللي بيأمنوا الفنادق، قلتله سلام عليكم هو ايه أخر الإخبار؟ رد عليا وقالي: «والله ما بعرف بس اللي سمعته من الظابط أن هتقوم حرب بين السعودية وإيران، وأن الملك سلمان مش هيستنى أي مفاوضات من أي بلد وأن ديه مسألة كرامة، وتخطي الحدود المسموحة دوليًا، وأن الحرب دي حياة أو موت، وأن إيران تخطت حدود الإسلام سواء سنة أو شيعة»، وأنا واقفة بتكلم مع الظابط سمعت أن السفارة السعودية في إيران اتحرقت، وسماع عن ضحايا ومصابين، وأنا بقول لنفسي يلا كملت بقا كأنكم مستنين لما أجي أعمل عمرة علشان تنكدوا عليه، وفجأة!..
عاجل: المتحدث العسكري السعودي، العميد الركن أحمد عسيري يذيع الخبر: «قوات التحالف سترد بشكلٍ قاسٍ من هذه اللحظة على الاعتداء السافر بخطف الأميرة»، مشيرًا إلى أن الحرس الثوري الإيراني سيدفعون الثمن ومن قاموا وخططوا لهذا الإعتداء.
وأضاف المتحدث في كلمة شديدة اللهجة: «أن السعودية لن تسكت على هذا الاعتداء، وأنها سوف تضرب إيران بكل قسوة وتعلن المملكة العربية السعودية الحرب على إيران».
ياخرابي حرب؟ أروح فين ولا آجي منين أنا دلوقتي! وفجأة.. «إيران تعلن الحرب».
وأنا الله يرحمني وقلت أروح عند الكعبة وأموت هناك، وأنا قدام الكعبة غمضت عيني، على أصوات غريبة قمت مخضوضة «هو الإيرانيين إيه اللي جابهم هنا»؟..«أنا كنت بحلم!» واضح إن صوت شخير «كابوس» أفندي كان أعلى من صوت المعركة وصحاني، عليت صوتي وقلتله: «قوم يا راجل مش كفاية اسمك اللي عملي كوابيس في حياتي.. هيبقى اسمك وصوتك كمان.. قوم يا راجل وهو ولا حياة لمن تنادي!».
