نشرت الإعلامية دينا صلاح عبد الله على صفحتها الشخصية على موقع التواصل الإجتماعي فيس بوك أزمتها في العمل في المجال الإعلامي وما تعانيه من صعوبة إيجاد وظيفة في ظل سيادة الواسطة والمحسوبية .
حيث كتبت دينا :
انا دنيا صلاح عبد الله ..عندي 27 سنه ..متخرجه من كليه الاعلام قسم إذاعة وتليفزيون بتقدير عام جيد جدا..مشروع تخرجي فيلم دوكيو دراما مدته 25 دقيقة أخرجته و كتبته و شاركت في مونتاچ و التصوير و تعبت جدا فيه..اشتغلت صحفيه او محررة بغض النظر عن المسمي ،في اكتر من مجله من وانا في ثالثة جامعة ومن ساعتها وطول الوقت وانا بشتغل و بسعي و بحاول..بس انا مش صحفيه ..انا خريجة إذاعة وتليفزيون ،درستها علشان طول عمري بحلم ابقي مذيعه ..انا متخرجه بقالي 6 سنين ..بحارب علشان اشتغل..كما لو اني بشحت..غلبت و أحبطت ..مبقتش عارفه ايه هي السكه اللي المفروض امشي فيها علشان اشتغل في الاعلام؟؟!!..اللي هو مجال دراستي..بروح اعمل تيستات في قنوات كتير ..بتصدم ان كله ماشي بالحب كدا زي ما بيقولوا و بالعلاقات ..مش بالشطارة و لا المهنية و لا المؤهل طبعا..اصلا يعني ايه حوالي 80%من العاملين في مجال الإعلام مش من خريجي كليه إعلام ؟؟!!!! مع احترامي لكل أساتذتي الإعلاميين..بس دا ظلم شديد..انا بقالي ٦ سنين متخرجه و باخد كورسات علشان أنمي موهبتي ..اشتغلت في ال6 سنين شهرين في قناة الحياه مراسله تليفزيونية (الحمد لله عملت شغل كويس جدا و فخورة بيه) وبعد كدا البرنامج اللي كنت بشتغل فيه أتوقف و طبعا كنت بشتغل من غير عقد فقعدت في البيت و بس بقيت الست سنين في رحلة البحث عن فرصه..اللي معرفش هتيجي امتي و ازاي و زهقت من الجمله الشهيرة اللي بسمعها في كل مكان بقدم فيه علي شغل "دا انتي باباكي بتليفون يشغلك" انا اسفه بجد دا خيال مريض..محدش في الزمن دا بيخدم حد بدون مقابل ..انا بتعرض لمفاوضات بجد ، اروح علشان اشتغل اسمع الجمله اللي وداني حفظتها و زهقت منها "انتي شاطرة جدا ..انتي ازاي مبتشتغليش..لالا ان شاء الله هنعمل حاجه كويسه مع بعض " افرح انا كلام جميل ..الجمله اللي بعدها علي طول "عايزين منك طلب
افندم
ممكن تكلميلنا بابا.............."
ولو مكلمتش بابا في اللي بيتطلب مني ..ميردوش عليا و يختفوا و يتهربوا..
و علي النقيض حد يقولي ممكن نكتب اسمك دنيا عبد الله بدل دنيا صلاح عبد الله علشان محدش يفتكر انك معتمدة علي باباكي
طبعا برفض ،مش علشان معتمدة علي بابايا ،لا دا علشان دا اسمي و فخر ليا.
ايوة انا اسمي دنيا صلاح عبد الله بنت الفنان صلاح عبدالله و ليا الشرف و فخورة جدا جدا بأبوية و وجوده في حياتي نعمة من نعم ربنا عليا وحب الناس ليه بيسعد قلبي..بس انا مش صلاح عبد الله يا ناس ،انا انسانة عايزة يبقي ليا كيان و قيمه في الحياه و مش المفروض ولا من الطبيعي اجبر ابويه علي اي حاجه يعملها مقابل اني اخد فرصه و اشتغل و اصلا دا حقي ..انا مش طلبه شغل وانا غير مؤهله ليه .. انا خريجة اعلام و الحمد لله عندي الموهبه ودا حقي..يعني ايه انا بقالي سنين بحارب علشان اشتغل و في قنوات بتجيب مودلز اعلانات يشغلوهم مذيعات .. مع كل احترامي و تقديري لمهنة المودلينج انا مش ضدها خالص ..بس هي غير مؤهله انها تبقي مذيعه ..طبعا في ناس عندهم الملكة والموهبه موافقه جدا..بس مايبقاش دا العادي و الدارج، ولا واحد يجيب مراته مذيعه و لا واحد يجيب صحبته مذيعه و بنت اخته مراسله وابن عمته مدير إنتاج و اخوه معد برامج بدون أي أساس لدا ..
حرام علشان القنوات تستسهل و تجيب ممثلين و مغنيين يعملوا برامج علشان هم مشاهير و بيجيبوا إعلانات وفلوس للقناه ..مع كامل احترامي للفنانين اللي بيعملوا برامج حتي لو كان أبوية من ضمنهم ..معنديش اي اعتراض ولا بقول مش من حقهم يعملوا برامج.. حد هيرد عليا يقولي طب باباكي ميعملش برنامج و يسيب ليكي الفرصه هقله بابايا مش هيفرضني علي حد ..هما عايزين نجم يبيعوا بيه ،تمام موافقه بس ميبقاش دا الدارج و دا السهل ..امال امتي انا واللي زيي هناخد فرصتنا و نغلط ونتعلم ونكتسب خبرة و ننجح ونكبر..
وكمان لما فكروا يعملوا نقابة للإعلاميين بيتكلموا في الشروط عن كل الناس إلا خريجي الإعلام ..وإن لازم اللي يلتحق بالنقابه يكون أشتغل في مجال الإعلام معرفش كام سنه خبرة..طب إزاي ؟؟! هو في حد أتاح لي فرصة اشتغل أصلا !!!علشان يبقي عندي سنين خبرة وممارسه؟؟!!! ايه الظلم دا؟؟؟!!!!
انا من حقي يكون ليا نقابه ..من حقي التحق بيها ..انا خريجة كليه الإعلام.
أنا بخاطب كل حد مسؤول ..يا سيادة المسؤولين انا عايزة أشتغل..دا حقي و هفضل أجري وراه.
انا متعلمتش في كليه صعبه و هلكت 4 سنين وأهلي صرفوا عليا من شقاهم وتعبهم علشان اقعد في البيت واشتغل مذيعه قدام المرايا.
Please support my point of view
Don't share
Please Copy and paste my words
اللي هيدعمني هيكتب في اول البوست "منقول"
